An Coimisiún le Feachtas Faisnéise Poiblí a Sheachadadh do Reifreann an 8 Márta
5 Nollaig 2023 – Dheimhnigh an Coimisiún Toghcháin (An Coimisiún), coimisiún neamhspleách toghcháin na hÉireann, go bhfuil a phleanáil ar bun cheana féin chun faisnéis a sholáthar faoin Reifreann atá le teacht ar an 8 Márta.
I measc a fheidhmeanna, tá an Coimisiún Toghcháin tar éis glacadh leis an ról a bhíodh ag an gCoimisiún Reifrinn roimhe seo chun faisnéis neamhspleách, neamhchlaonta a sholáthar faoi na tograí atá á gcur faoi bhráid an phobail, agus chun daoine a spreagadh chun vóta a chaitheamh.
Tá an Coimisiún ag ullmhú an fheachtais faisnéise neamhspleách anois, a bheidh ar siúl ar fud ár meán náisiúnta agus réigiúnach, agus an leabhrán faisnéise a bheidh le seachadadh chuig gach áit chónaithe sa tír.
Agus dáta vótála deimhnithe anois, meabhraíonn an Coimisiún do dhaoine freisin gur féidir leo a chinntiú go bhfuil siad ar chlár na dtoghthóirí trí www.voter.ie a sheiceáil, agus iarratas a dhéanamh ar vóta poist más gá.
Dúirt Cathaoirleach an Choimisiúin Toghcháin, Breitheamh sa Chúirt Uachtarach, an Breitheamh Marie Baker:
“Mar choimisiún neamhspleách toghcháin na hÉireann, tá an Coimisiún Toghcháin ag tnúth lenár gcéad fheachtas faisnéise reifrinn riamh a reáchtáil ó ghlacamar an ról tábhachtach seo ón gCoimisiún Reifrinn níos luaithe i mbliana.”
– CRÍOCH –
Tá tuilleadh eolais ar fáil ó:
Brian Dawson, an Bainisteoir Cumarsáide agus Rannpháirteachas an Phobail,
An Coimisiún Toghcháin,
Brian.dawson@electoralcommission.ie / 086 0749344
Nóta d’Eagarthóirí:
An Coimisiún Toghcháin
Is comhlacht reachtúil neamhspleách é an Coimisiún Toghcháin a bunaíodh an 9 Feabhra 2023 ag a bhfuil freagracht as raon leathan d’fheidhmeanna toghcháin a leagtar amach san Acht um Athchóiriú Toghcháin, 2022. Tá an Coimisiún lárnach do chóras toghcháin na hÉireann, agus tugann sé faoi raon feidhmeanna toghcháin atá ann cheana féin, ina measc:
- tabhairt faoi athbhreithnithe agus tuarascálacha a chur i dtoll a chéile faoi thoghcheantair le haghaidh comhaltaí a thoghadh don Dáil agus comhaltaí a thoghadh do Pharlaimint na hEorpa.
- freagracht as páirtithe polaitíochta a chlárú.
- na seirbhísí cinnteoireachta, maoirseachta, rúnaíochta agus tacaíochta a bhaineann le hábhar na dtograí reifrinn a mhíniú, cur chun cinn fheasacht an phobail ar reifrinn agus spreagadh na dtoghthóirí chun vóta a chaitheamh ar reifrinn; agus
- tuarascálacha a chur i dtoll a chéile don Aire maidir le teorainneacha toghcháin áitiúil.
Leagtar cúraimí ar an gCoimisiún freisin i dtaobh róil nua toghcháin éagsúla san Acht um Athchóiriú Toghcháin, ina measc:
- cláir taighde a ullmhú agus taighde a dhéanamh ar bheartas agus nós imeachta toghcháin, agus comhairle a thabhairt, de réir mar is gá, don Aire agus don Rialtas.
- feasacht an phobail ar phróisis toghcháin agus dhaonlathacha an Stáit a chur chun cinn, agus oibriú chun rannpháirtíocht an phobail iontu a mhéadú, trí chláir oideachais agus eolais;
- maoirseacht a dhéanamh ar Chlár nuachóirithe na dToghthóirí, moltaí a dhéanamh agus caighdeáin a leagan maidir le cothabháil agus nuashonrú;
- fógraíocht pholaitiúil ar líne a n-íoctar aisti a rialú, ag cinntiú trédhearcachta maidir le fógraí polaitiúla ar líne i rith tréimhse feachtais toghcháin nó reifrinn; (níor cuireadh tús leis go fóill).
- freagracht as imscrúdú agus monatóireacht ar bhréagaisnéis ar líne, mífhaisnéis ar líne agus iompraíocht ionramhálach nó bhréagach ar líne i rith tréimhsí feachtais toghcháin, chomh maith le feidhmeanna chun iompraíocht ionramhálach nó bhréagach ar líne a sheachaint; (níor cuireadh tús leis go fóill).
- tuarascálacha ex post a ullmhú ar riar imeachtaí toghcháin.
Meastar go leathnófar an tsraith feidhmeanna a leagadh ar an gCoimisiún ar dtús de réir mar a fhorbraíonn sé a chuid acmhainní agus saineolais.