Seiceáil an clár

Tugann vótáil deis duit páirt a ghlacadh i gcinnteoireacht a théann i bhfeidhm ar do shaol agus ar thodhchaí na hÉireann Is é do vóta do ghuth, mura gcaitheann tú vóta, déanfaidh daoine eile na cinntí sin duit.

Chun cead cainte a fháil agus do chuid a rá faoi cheisteanna tábhachtacha trí vóta a chaitheamh, caithfidh tú a bheith ar Chlár na dToghthóirí.

Tá sé éasca clárú le haghaidh vótála nó chun a sheiceáil an bhfuil do chuid sonraí cruinn agus cothrom le dáta. Is féidir é sin a dhéanamh trí dhul go www.checktheregister.ie

Más gá duit aon chuid de do shonraí pearsanta a thabhairt cothrom le dáta – ainm, náisiúntacht, srl. – nó do sheoladh a athrú ar an gclár, is é an bealach is tapa lena dhéanamh ná ar www.checktheregister.ie

Mura bhfuil tú in ann do shonraí a thabhairt cothrom le dáta nó do sheoladh a athrú ar checktheregister.ie, ba cheart duit dul i dteagmháil le d’údarás áitiúil. Beidh siadsan in ann do shonraí a thabhairt cothrom le dáta le Foirm ERF1.

Tabhair faoi deara, sa chás go bhfuil tú:

• Ag aistriú ó Bhaile Átha Cliath go contae ar bith lasmuigh de Bhaile Átha Cliath; nó

• Ag aistriú go Baile Átha Cliath ó chontae ar bith lasmuigh de Bhaile Átha Cliath,

caithfidh tú Foirm ERF1 a úsáid chun do shonraí a thabhairt cothrom le dáta nó do sheoladh a athrú. Ní féidir leat leas a bhaint as www.checktheregister.ie. Is féidir leat an fhoirm sin a chomhlánú agus a sheoladh chuig d’údarás áitiúil ábhartha a phróiseálfaidh d’iarratas chun do chuid sonraí a thabhairt cothrom le dáta.

Ceadaítear vótáil tríd an bpost i dtaobh catagóirí áirithe daoine, mar a leagtar síos i ndlí toghcháin.

San áireamh tá:
– Baill An Garda Síochána
– Baill Óglaigh na hÉireann
– Taidhleoirí Éireannacha atá ag déanamh seirbhíse thar lear, agus a gcéilithe/bpáirtithe.
– Daoine nach féidir leo vóta a chaitheamh ag a stáisiún vótála áitiúil de dheasca tinnis nó míchumais
– Vótálaithe le slí bheatha, seirbhís nó fostaíocht a chiallaíonn gur dócha nach mbeidh said in ann vóta a chaitheamh i bpearsan ar lá na vótála.
– Mic léinn lánaimseartha atá cláraithe ag a mbaile agus atá ina gcónaí in áit eile agus iad ag freastal ar institiúid oideachais sa Stát
– Vótálaithe Anaithnid nó baill teaghlaigh an té a bheadh i gcontúirt dá bhfoilseofaí a n-ainm nó a seoladh ar Chlár na dToghthóirí.
– Príosúnaithe

Is féidir na foirmeacha cuí le clárú le haghaidh vóta poist a fháil ó Check the Register nó d’Údarás Áitiúil. Féach ar liosta teagmhála de na hÚdaráis Áitiúla.

Is féidir le duine a bhfuil cónaí air in ospidéal, teach altranais, saoráid meabhair-shláinte nó institiúid dá samhail, agus a bhfuil míchumas nó breoiteacht air a chuireann cosc orthu dul go dtí an stáisiún vótála, vótáil san ospidéal, sa teach altranais nó in áis chomhchosúil má dhéanann siad iarratas ar a bheith san áireamh ar liosta na vótálaithe ar leith arna ullmhú agus arna chothabháil ag údaráis chlárúcháin (comhairle contae, cathrach agus cathrach agus contae) mar chuid de chlár na dtoghthóirí.

I gcás céad iarratais, agus aon uair a éilíonn na húdaráis chlárúcháin i gcás iarratais ina dhiaidh sin, ní mór deimhniú ó lia-chleachtóir cláraithe (amhail dochtúir teaghlaigh) a bheith ag gabháil leis).

Más mian leat clárú mar vótálaí ar leith, ba cheart duit amhlaidh a dhéanamh trí fhoirm SV1 a líonadh amach, atá ar fáil ar www.checktheregister.ie nó ó d’Údarás Áitiúil. Féach ar liosta teagmhála de na hÚdaráis Áitiúla.