Fáilte roimh Rabharta Iarratas le haghaidh Vótála san Olltoghchán
Tá Acmhainní ag Vótálaithe Nua & Reatha chun Tacú Leo Vótáil ar an 29 Samhain
13 Samhain 2024 – D’fháiltigh an Coimisiún Toghcháin, coimisiún neamhspleách toghcháin na hÉireann, roimh an mborradh suntasach ar iarratais ó dhaoine le dul ar chlár na dtoghthóirí agus a gcuid sonraí a thabhairt cothrom le dáta le go gcaithfidh siad vóta san Olltoghchán ar an 29 Samhain.
Fuarthas 115,130 iarratas ó vótálaithe nua trí na suíomhanna gréasáin Voter.ie ó thús mhí na Samhna, agus fuarthas 50,541 iarratas eile chun clárúcháin reatha daoine a thabhairt cothrom le dáta ar na suíomhanna sin ó thús na míosa.
Dhún an spriocdháta le clárú le vótáil in Olltoghchán 2024 ag meán oíche aréir. Fuarthas beagnach 55,000 iarratas ó vótálaithe nua sa dá lá roimh an spriocdháta agus os cionn 21,000 iarratas ar shonraí a thabhairt cothrom le dáta.
Ó thús na bliana, rinneadh 428,073 iarratas ar chlárú chomh maith le 225,383 iarratas eile chun sonraí clárúcháin a bhí ar an gclár cheana féin a thabhairt cothrom le dáta nó a leasú.
I measc fheidhmeanna an Choimisiúin Toghcháin, coimisiún neamhspleách toghcháin na hÉireann, tá de dhualgas air feasacht a mhéadú ar thoghcháin na hÉireann agus líon na ndaoine a chláraíonn agus a chaitheann vóta a mhéadú trí fheachtais oideachais agus eolais.
Chuir an Coimisiún uirlisí ar fáil do vótálaithe nuachláraithe agus reatha roimh an toghchán, ina measc:
- Físeán ina mínítear ‘Conas Vóta a Chaitheamh’
- Uirlis mhapála ‘Aimsigh Mo Dháilcheantar’
- Treoracha Éasca le Léamh faoin Olltoghchán
Agus tá an Coimisiún ag freagairt Ceisteanna Coitianta faoi na gnéithe ar fad den toghchán agus faoi vóta a chaitheamh ar ár suíomh gréasáin.
Dúirt Art O’Leary, Príomhfheidhmeannach an Choimisiúin Toghcháin:
“Ba mhaith linn fáilte a chur roimh na vótálaithe nua seo go léir, agus buíochas a ghabháil leo as an am a thógáil chun clárú le vótáil nó a gcuid sonraí a nuashonrú, agus ár mbuíochas freisin leo siúd go léir a thóg an t-am chun a gcuid sonraí reatha a nuashonrú, rud a chabhraíonn le cruinneas foriomlán an chláir.
“Tá feachtas faisnéise poiblí ar bun ag an gCoimisiún ó mhí Dheireadh Fómhair chun vótálaithe a chlárú agus iad a chur ar an eolas faoi spriocdhátaí an Olltoghcháin le fógraí, agallaimh leis na meáin, imeachtaí poiblí agus feachtas meán sóisialta a bhí ar siúl suas go dtí an spriocdháta ag meán oíche aréir.
“Ba cheart aitheantas mór a thabhairt do na foirne toghchórais ar fud chomhairlí cathrach agus contae na hÉireann atá ag obair gan stad gan staonadh chun an clár a thabhairt cothrom le dáta leis na daoine nua sin ar fad roimh an toghchán.
“Ó tharla go bhfuil an spriocdháta clárúcháin thart, tá am ag vótálaithe a n-iarrthóirí áitiúla a mheas agus aon cheisteanna is mian leo a phlé a chur orthu. Tá eolas ar ár suíomh gréasáin ElectoralCommission.ie faoin dáilcheantar ina bhfuil cónaí ort, conas vótáil, agus an méid a theastaíonn le vóta a chaitheamh.
“Is é do Vóta do Ghuth agus mar sin táimid ag iarraidh ar na vótálaithe nua seo go léir cúpla nóiméad a thógáil ar an 29 Samhain lena chinntiú go gcloistear bhur nguth san Olltoghchán seo.”
– CRÍOCH –
Tá tuilleadh eolais ar fáil ó:
Brian Dawson, an Bainisteoir Cumarsáide agus Rannpháirteachas an Phobail,
An Coimisiún Toghcháin,
086 0749344 Brian.dawson@electoralcommission.ie
Nóta d’Eagarthóirí:
Tagann na figiúirí thíos ó na figiúirí iarratas ar na suíomhanna gréasáin Voter.ie. Níl iarratais a rinneadh sa phost nó go pearsanta leis na húdaráis áitiúla ina measc.
Thug an Roinn Tithíochta, Rialtais Áitiúil agus Oidhreachta na figiúirí don Choimisiún Toghcháin.
Figiúirí na Samhna
| Samhain 2024 (CTR + Voter) | Clárúchán Nua | Nuashonrú ar Chlárúchán | Iomlán Mór |
| 01/11/2024 | 1,045 | 697 | 1,742 |
| 02/11/2024 | 1,030 | 587 | 1,617 |
| 03/11/2024 | 1,359 | 761 | 2,120 |
| 04/11/2024 | 2,384 | 1,369 | 3,753 |
| 05/11/2024 | 3,133 | 1,485 | 4,618 |
| 06/11/2024 | 5,917 | 2,905 | 8,822 |
| 07/11/2024 | 13,024 | 6,447 | 19,471 |
| 08/11/2024 | 14,099 | 6,763 | 20,862 |
| 09/11/2024 | 9,182 | 4,088 | 13,270 |
| 10/11/2024 | 9,157 | 3,838 | 12,995 |
| 11/11/2024 | 24,634 | 9,813 | 34,447 |
| 12/11/2024 | 30,166 | 11,788 | 41,954 |
| Iomlán Mór | 115,130 | 50,541 | 165,671 |
2024 go dtí seo
| 2024 go dtí seo (CTR + Voter) | Clárúchán Nua | Nuashonrú ar Chlárúchán | Iomlán Mór |
| 2024 | |||
| Eanáir | 39,608 | 36,467 | 76,075 |
| Feabhra | 80,767 | 45,989 | 126,756 |
| Márta | 39,103 | 22,501 | 61,604 |
| Aibreán | 27,140 | 11,486 | 38,626 |
| Bealtaine | 92,103 | 31,929 | 124,032 |
| Meitheamh | 11,256 | 9,932 | 21,188 |
| Iúil | 1,745 | 1,955 | 3,700 |
| Lúnasa | 1,473 | 1,567 | 3,040 |
| Meán Fómhair | 2,948 | 1,687 | 4,635 |
| Deireadh Fómhair | 16,800 | 11,329 | 28,129 |
| Samhain | 115,130 | 50,541 | 165,671 |
| Iomlán Mór | 428,073 | 225,383 | 653,456 |
Figiúirí Seachtainiúla ó Mheán Fómhair 2024
| Figiúirí Seachtainiúla ó Mheán Fómhair 2024 (CTR + Voter.ie) | Clárúchán Nua | Nuashonrú ar Chlárúchán | Iomlán Mór |
| 02/09/2024 – 08/09/2024 | 379 | 297 | 676 |
| 09/09/2024 – 15/09/2024 | 538 | 361 | 899 |
| 16/09/2024 – 22/09/2024 | 799 | 376 | 1,175 |
| 23/09/2024 – 29/09/2024 | 1,031 | 539 | 1,570 |
| 30/09/2024 – 06/10/2024 | 1,985 | 1,221 | 3,206 |
| 07/10/2024 – 13/10/2024 | 1,867 | 1,565 | 3,432 |
| 14/10/2024 – 20/10/2024 | 3,515 | 2,422 | 5,937 |
| 21/10/2024 – 27/10/2024 | 5,648 | 3,696 | 9,344 |
| 28/10/2024 – 03/11/2024 | 7,388 | 4,562 | 11,950 |
| 04/11/2024 – 10/11/2024 | 56,896 | 26,895 | 83,791 |
| 11/11/2024 – 13/11/2024 | 54,800 | 21,601 | 76,401 |
| Iomlán Mór | 134,846 | 63,535 | 198,381 |
An Coimisiún Toghcháin
Is comhlacht reachtúil neamhspleách é an Coimisiún Toghcháin a bunaíodh an 9 Feabhra 2023 ag a bhfuil freagracht as raon leathan d’fheidhmeanna toghcháin a leagtar amach san Acht um Athchóiriú Toghcháin, 2022. Tá an Coimisiún lárnach do chóras toghcháin na hÉireann, agus tugann sé faoi raon feidhmeanna toghcháin atá ann cheana féin, ina measc:
- freagracht as páirtithe polaitíochta a chlárú;
- feasacht an phobail ar phróisis toghcháin agus dhaonlathacha an Stáit a chur chun cinn, agus oibriú chun rannpháirtíocht an phobail iontu a mhéadú, trí chláir oideachais agus eolais;
- maoirseacht a dhéanamh ar Chlár nuachóirithe na dToghthóirí, moltaí a dhéanamh agus caighdeáin a leagan maidir le cothabháil agus nuashonrú;
- fógraíocht pholaitiúil ar líne a n-íoctar aisti a rialú, ag cinntiú trédhearcachta maidir le fógraí polaitiúla ar líne i rith tréimhse feachtais toghcháin nó reifrinn; (Níor cuireadh tús leis an reachtaíocht go fóill); agus
- freagracht as imscrúdú agus monatóireacht ar bhréagaisnéis ar líne, mífhaisnéis ar líne agus iompraíocht ionramhálach nó bhréagach ar líne i rith tréimhsí feachtais toghcháin, chomh maith le feidhmeanna chun iompraíocht ionramhálach nó bhréagach ar líne a sheachaint; (Níor cuireadh tús leis an reachtaíocht go fóill).
Leagtar cúraimí ar an gCoimisiún freisin i dtaobh róil nua toghcháin éagsúla, ina measc:
- tuarascálacha a chur i dtoll a chéile don Aire maidir le teorainneacha toghcháin áitiúil;
- cláir taighde a ullmhú agus taighde a dhéanamh ar bheartas agus nós imeachta toghcháin, agus comhairle a thabhairt, de réir mar is gá, don Aire agus don Rialtas;
- tuarascálacha ex post a ullmhú ar riar imeachtaí toghcháin;
- na seirbhísí cinnteoireachta, maoirseachta, rúnaíochta agus tacaíochta a bhaineann le hábhar na dtograí reifrinn a mhíniú, cur chun cinn fheasacht an phobail ar reifrinn agus spreagadh na dtoghthóirí chun vóta a chaitheamh ar reifrinn; agus
- tabhairt faoi athbhreithnithe agus tuarascálacha a chur i dtoll a chéile faoi thoghcheantair le haghaidh comhaltaí a thoghadh don Dáil agus comhaltaí a thoghadh do Pharlaimint na hEorpa.
Meastar go leathnófar an tsraith feidhmeanna a leagadh ar an gCoimisiún ar dtús de réir mar a fhorbraíonn sé a chuid acmhainní agus saineolais.